Dinepensahan ng Office of the Vice President ang mga biyahe ni Vice President Sara Duterte sa ibang bansa.
Ayon sa OVP, bahagi ng mandato ng pangalawang pangulo ang makipag-ugnayan sa mga Pilipino sa loob at labas ng bansa.
Nilinaw rin ng tanggapan na walang ginamit na pondo si VP Sara para sa biyahe niya patungong ibang bansa.
Una nang kinumpirma ng OVP ang pagbisita ni Vice President Duterte sa Kuwait, kung saan nakipagpulong siya sa mga miyembro ng Filipino community upang talakayin ang mga isyung kinakaharap ng mga overseas worker.
Kasabay nito, tiniyak din ng OVP na patuloy itong naglilingkod sa kabila ng limitadong pondo, sa pamamagitan ng sampung satellite offices sa bansa at pagpapanatili ng ugnayan sa mga komunidad ng Pilipino sa ibayong dagat.
Samantala, tumanggi ang Malacañang na kumpirmahin kung nabigyan ng travel authority si VP Duterte para sa kanyang mga biyahe ngayong buwan.
