Pinaplantsa na ng Philippine National Police (PNP) ang security template para sa ilulunsad na “Oplan Ligtas Paskuhan” ngayong holiday season.
Ayon kay PNP-PIO Chief Chief Supt. Wilben Mayor, magsisilbing gabay ng mga pulis ang Oplan Ligtas Paskuhan para sa pag-alalay sa publiko kung saan buhos na ang mga tao sa mga malls at mga lugar ng pamilihan para mamili ngayong Christmas season.
Sinabi ni Mayor na nakapaloob sa oplan ang deployment ng mga kapulisan sa mga sakayan ng bus, pantalan at mga paliparan.
Magpapatrolya rin ang mga pulis sa paligid ng mga malls at sa loob nito depende sa koordinasyon ng mga ground commander sa management ng mall.
Mahigpit ding tututukan ng PNP ang pagsasaayos sa daloy ng trapiko at ang intelligence monitoring laban sa mga grupong nais maghasik ng karahasan.
By Mariboy Ysibido
