Maaari nang magsimula ang lahat ng degree programs sa mga unibersidad at kolehiyo ng limited face to face classes sa susunod na buwan.
Sinabi ni Commission on Higher Education (CHEd) Chairman Prospero De Vera, kailangan lamang nasusunod nito ang mga inilatag na guidelines sa pagbabalik ng in person classes.
Sa ilalim ng pinalawig na limitadong face-to-face classes, maaari na aniyang muling buksan ng mga Higher Education Institution (HEI) ang kanilang mga paaralan sa ilalim ng ilang kondisyon.
Kabilang dito, kailangan fully vaccinated laban sa COVID-19 ang mga estudyante at faculty members na makikilahok sa limitadong in-person classes.
Bukod dito, kailangan ding makasunod sila sa mga requirements sa minimum health standards sa pagsasaayos ng kanilang mga pasilidad.
Samantala, binigyang linaw naman ni De Vera na tanging sa mga lugar lamang na nasa ilalim ng alert level 2 at pababa ang maaaring magsagawa ng face to face classes.
