Ipinag-utos ni Manila Police District (MPD) Director P/BGen. Leo Francisco sa lahat ng kaniyang mga tauhan na nag-duty sa katatapos lang na Traslacion ng itim na Nazareno na obserbahan ang kanilang mga sarili.
Ito’y kasunod ng pagdagsa ng maraming deboto sa paligid ng simbahan ng Quiapo kahapon na nagresulta sa pagkukumpulan na labag sa itinakdang minimum health protocols para sa COVID-19.
Ayon kay Francisco, dapat mag-isolate ang mga pulis sa sandaling makaramdam sila ng anumang sintomas ng sakit dulot ng virus upang maiwasan ang hawaan.
Umaasa ang Heneral na walang magiging problema sa kalusugan ng kaniyang mga tauhan matapos ma-expose sa dami ng tao bagama’t maayos at mapayapa naman itong naidaos.