Aminado ang Food and Drug Administration o FDA na ang kakulangan ng budget ng pamahalaan ang dahilan ng kanilang pagtanggap ng pondo mula sa private institution.
Sa pagdinig ng House Committee on Good Government and Public Accountability, ginisa ng mga kongresista ang FDA ng kaugnay sa kwestyunableng pagtanggap nito ng grant mula sa International Union Against Tuberculosis and Lung Diseases o The Union noong 2016.
Ang The Union ang katuwang ng bloomberg initiative sa pamamahala sa adbokasiya laban sa lahat ng uri ng tobacco products kabilang ang e-cigarettes at heated tobacco products.
Tinanong ni Deputy Speaker Rodante Marcoleta kung hindi ba masaya ang ahensya sa pondong inilalaan ng gobyerno bagay na dinepensahan ni ana rivera ng fda sa pagsasabing aabot lamang sa P4 milyon ang alokasyon para sa operational expenses at hindi kasama rito ang gastos sa research at hiring ng mga dagdag na tauhan.
Ipinunto rin ni Rivera na wala silang extra na pondo kaya’t nagdesisyon ang FDA na mag-apply ng grant.
Bagaman umapela ang FDA sa kongreso na lakihan ang pondo ng ahensya lalo’t nais din nilang i-modernize ang kanilang laboratory capability, iginiit ni Marcoleta na wala sa posisyon ang ahensya at ibang kagawaran na tumanggap ng pondo mula sa private institution.—ulat mula kay Jill Resontoc (Patrol 7)