Tiniyak ni Senate Committee on Finance Chairperson Loren Legarda na naging transparent ang buong proseso ng pagpasa sa 2016 national budget.
Sa harap na rin ito ng alegasyon ni Senador Pia Cayetano na patago at niloko sila sa ginawang pagtapyas ng isang bilyong piso sa budget ng Department of Health (DOH) para sa Family Health and Responsible Parenthood Program.
Iginiit ni Legarda na nakapaloob lahat ng panukalang pagbabago sa budget sa bicam report na niratipikahan ng Senado, bagay na siya ring nakapaloob sa General Appropriations Act na nilagdaan ng Pangulong Benigno Aquino III.
Paliwanag ng senadora, hindi unilateral ang ginawang pagbabago sa halip ay desisyon ito ng mga bicam members mula sa mataas at mababang kapulungan ng Kongreso.
By Meann Tanbio | Cely Bueno (Patrol 19)