Pinadalhan ng demand letter ng legal counsel ng Thai actor na si Mario Maurer ang komedyanteng si Kakai Bautista upang itigil na nito ang pagpapakalat ng di umano’y relasyon nila ng aktor.
Batay sa ulat ng PEP, may titulong Demanding to Cease, Desist and Refrain from further use and reference of the name of Mario Maurer ang pinadalang sulat ng Kwaonhar Nine Nine Co., Ltd.,ang kumpanyang nagma-manage kay Maurer kung saan nakasaad na pinabubulaanan nito ang closeness ng aktor at ng komedyante.
Nais ng kampo ng aktor na gumawa at magpadala sa kanila ang kampo ng komedyante ng pormal na sulat na nagsasaad na hindi na muling gagamitin ni Kakai ang pangalan ni Maurer sa pagpapakalat ng ‘di totoong closeness nila ng aktor.
Babala ng kampo ni Maurer na kung ‘di tutupad ng aktres sa hiling ng kanilang kampo ay magsasampa sila ng kaukulang kaso sa aktres.
Samantala, hindi pa naglalabas ng pormal na pahayag ang kampo ni Kakai kaugnay rito—sa panulat ni Agustina Nolasco
