Nagpahayag ng kani-kanilang opinyon ang ilang Senador kaugnay sa paglikha ng Department for Overseas Filipinos.
Ito’y sa muling pagdinig ng senate committee on labor sa naturang panukala na sinertipikahan bilang urgent ni Pangulong Rodrigo Duterte.
Ayon kasi kay Sen. Sherwin Gatchalian, tila panghihikayat sa mga Pinoy na magtrabaho sa ibang bansa ang pagsusulong sa pagbuo ng nasabing departamento taliwas sa sinasabi ng gobyerno na gusto nilang dito na lamang sa Pilipinas magtrabaho ang mga kababayang manggagawa.
Inirekomenda naman ni Sen. Imee Marcos na sa halip na lumikha ng departamento ay mag-isyu na lang ng Executive Order na magkakaloob ng expanded authority sa POEA dahil magastos kung lilikha pa ng hiwalay na departamento.
Kinuwestiyon naman ni Sen. Joel Villanueva ang hindi pa rin pagkakaroon ng solusyon sa problema sa mga illegal recruitment kung saan dalawa pa lang ang conviction gayong maraming Filipino ang nabibiktima ng mga ito.
Humingi naman ng panahon si dating labor secretary Minority Leader Franklin Drilon para basahin ang mga dokumento o naging presentasyon ukol sa panukalang DOFiL.
Iginiit naman ni Senate Majority Leader Juan Miguel Zubiri na madaliin na ang pagdinig at pagpasa sa panukala dahil makabubuti ito sa milyon-milyong OFW.
Isinulong din ni Senator Christopher Bong Go ang agarang pag-apruba sa DOFiL dahil magbebenepisyo at mas mapoprotektahan aniya ang kapakanan ng nasa 10-M OFW.
Layon ng pagbuo ng DOFiL na matutukan ang pangangailangan at mas mabigyang proteksyon ang mga OFW.