Hinikayat ng Commission on Elections (Comelec) ang mga kandidato at partido na baklasin ang mga Campaign poster na makikitang nakapaskil sa maling lugar.
Ayon sa Comelec, mas mainam kung mismong mga Kandidato o Partido na ang magkukusang magtanggal ng Campaign posters upang hindi na gayahin pa ng iba pang mga tatakbo sa eleksiyon.
Bukod pa dito, matutulungan din ang kanilang ahensya sa pagbaklas ng mga Campaign materials.
Nabatid na mayroong itinalagang Common Poster Area ang Comelec sa bawat lugar sa bansa.
Sakaling may paglabag, susulatan ng Comelec ang kandidato o partido para ipaalam ang kanilang nalabag.
Muli namang nagpaalala ang Comelec na mahigpit na ipinagbabawal ang pagdikit ng Campaign posters sa mga puno, poste, kawad ng kuryente, eskwelahan, waiting shed, sidewalk, traffic signs, tulay, Barangay Hall, Health Centers at iba pang public buildings. —sa panulat ni Angelica Doctolero