Humingi ng paumanhin sa publiko si Cavite Gov. Jonvic Remulla matapos nitong magpa-test para sa coronavirus disease (COVID-19).
Ito’y sa kabila ng panuntunan ng Department of Health (DOH) na tanging mga nagpapakita ng sintomas lamang ng pagkakaroon ng COVID-19 ang maaaring magpa-test.
Paliwanag ni Remulla, nagawa niyang magpa test matapos malaman na mayroon siyang nakasalamuha sa isang pagpupulong na nagpapakita ng sintomas na may sakit.
Ani Remulla kung sa tingin ng publiko ay nagamit niya ang kaniyang posisyon para makapagpa-test kahit “asymptomatic” o wala siyang nararamdamang sintomas ay handa umano siyang harapin ang anomang kaparusahan.
Una rito ilang opisyal na rin ang nagpa COVID test kahit asymptomatic gaya nina Pangulong Rodrigo Duterte at pamilya nito at ilang mga senador at lokal na opisyal.
Ngunit ayon kay Senate Pres. Vicente Sotto III, mahalagang matiyak ang kalusugan ng mga opisyal ng gobyerno upang makapagtuloy sa pagbibigay serbisyo publiko.
