Sarado ang ilang bahagi ng Ninoy Aquino International Airport Expressway o NAIX dahil sa maintenance work simula ngayong linggo.
Ayon sa Skyway O and M Corporation, isasara ang bahagi ng NAIAX patungong Gil Puyat Avenue, Amorsolo Street, Don Bosco Technical Institute at EDSA simula mamayang alas 10:00 ng gabi hanggang alas 4:00 ng hapon kinabukasan.
Ang bahagi naman na patungong Bicutan, Sucat, Alabang at South Luzon Expressway ay isasara sa mga motorista simula alas 10:00 ng gabi bukas hanggang alas 4:00 ng madaling araw sa Miyerkules, Mayo 1.
Inabisuhan naman ang mga motorista na gamitin ang sales road bilang alternatibong ruta.
Samantala, pansamantalang pinagbabawal ang sobrang laking mga sasakyan sa NLEX-Balintawak Toll Plaza dahil sa asphalt repair at excavation works sa wide lane N17 hanggang Mayo 10.
Maaari namang dumaan ang mga apektadong driver sa Mindanao at Karuhatan Toll Plazas papasok ng NLEX.
