Halos 500 pribadong paaralan ang nagtaas ng matrikula para sa school year 2018-2019.
Ayon kay Education Undersecretary Jesus Mateo nasa 478 mula sa halos 12,000 private schools sa buong bansa ang pinayagan nilang magtaas ng matrikula sa darating na pasukan.
Sinabi ni Mateo na posibleng tumaas pa ang bilang ng mga magtataas ng tuition dahil anim na rehiyon pa lamang kabilang ang National Capital Region o Metro Manila, Calabarzon, Mimaropa, Caraga at Regions 10 at 12 ang nakapagsumite ng kanilang report.
Hindi naman tinukoy ni Mateo kung magkano ang dagdag matrikula subalit inihayag ng DepEd-NCR na lima hanggang 15 porsyento lamang ang inaprubahang dagdag tuition sa taong ito.
Ipinabatid ni Mateo na pangunahing dahilan ng tuition fee increase ay para dagdagan ang suweldo ng mga guro lalo na’t karamihan sa mga ito ay lumilipat na sa public schools dahil mas mataas ang suweldo mg public school teachers.
—-