Pinapurihan ni Senadora Grace Poe ang DOTr o Department of Transporation matapos tumaas na sa 15 tren ang napatakbo ng MRT o Metro Rail Transit Line 3.
Ayon sa senadora, umaasa siyang magtutuloy – tuloy na ang muling pagkabuhay ng magandang serbisyo ng MRT upang mabura na ang aniya’y nakadidismayang record nito dahil sa sunud – sunod na mga aberya at pagkadiskaril ng tren.
Umaasa rin si Poe na maiibsan na rin kahit paano ang pagsasakripisyo ng mga komyuter na araw – araw nagtitiis sa mahabang pila na kung minsan ay pinabababa pa ng tren sa tuwing mayruong aberya rito.
Hindi na aniya malayong matupad na rin ang iba pang pangako ng DOTr na maging 20 na ang mga tatakbong tren sa MRT at kalauna’y madagdagan pa sa apat ang mga bagon ng bawat isang tren.
