Nailigtas ng mga awtoridad ang apat na kidnap victim sa Sirawai Zamboanga del Norte matapos na abandonahin ng kanilang mga kidnappers.
Kinilala ang mga nailigtas na sina Roger Jung-An, Jomar Maglangit, Jomar Mantangan at Raymond Purisima na kabilang sa limang dinukot ng mga armadong kalalakihan noong Marso 3.
Ayon kay Joint Task Force Zampelan Commander Major General Roseller Murillo, iniwan ang mga nasabing biktima ng kanilang kidnappers dahil na rin sa pinaigting na operasyon ng mga awtoridad.
Sinabi pa ni Murillo na una nang nasawi ang isa pang biktimang si Mario Rosales matapos na matamaan ng bala nang maipit sa bakbakan sa pagitan ng mga awtoridad at kidnappers noong nakaraang linggo.
Nakatakda namang i-turn over sa 42nd Infantry Battalion ang mga nailigtas na kidnap victim habang nagpapatuloy pa operasyon laban sa mga kidnappers.
—-
