Sasampahan na ng kasong kriminal ang sampung pulis Mandaluyong at tatlong barangay tanod na sangkot sa palpak na shooting incident sa barangay Addition Hills, noong December 28.
Ayon kay Senior Supt. Florendo Quibuyen, hepe ng Mandaluyong City Police-Special Investigation Task Group-Shaw, kasong reckless imprudence resulting to frustrated homicide at double homicide ang kahaharapin ng labingtatlo.
Kasalukuyang nakapiit ang siyam na pulis sa selda ng Mandaluyong City Police habang ang kanilang team leader na si Senior Insp. Maria Christina Vasquez ay isinailalim sa restrictive custody ni Mandaluyong City Police Officer-In-Charge, Supt. Enrique Agtarap.
Nasawi sa naturang insidente na naganap sa kanto ng Old Wack-Wack Road at Shaw Boulevard ang mga sibilyang sina Jonalyn Amba-An at Jomar Hayawon.
Isusugod lamang sana sa ospital lulan ng Mitsubishi Adventure nina Hayawon kasama ang anim na iba pa si Amba-On na noo’y sugatan dahil naunang insidente ng pamamaril nang harangin sila ng mga pulis dahil sa pag-aakalang getaway vehicle ng mga suspek sa pamamaril kay Jonalyn ang ginamit nina Hayawon.
