Umapela na ang Police Regional Office (PRO) – Eastern Visayas sa publiko na agad ireport sa kanila kung mayroong mamataang mga blue container na maaaring naglalaman ng cocaine at palutang-lutang sa karagatan.
Ayon sa PRO-8, partikular silang nananawagan sa mga residente sa mga baybaying lugar sa Northern, Western at Eastern Samar.
Ito’y makaraang madiskubre noong Enero 20 ang dalawangpo’t apat (24) na kilo ng cocaine na inanod mula sa Matnog, Sorsogon.
Pinaniniwalaang nagmula ang mga droga sa isang Chinese vessel na Jin-Ming napilitang dumaong sa bayan ng Pambujan, Northern Samar.
Matatandaang Enero 3 nang na-rescue ang mga sakay ng Chinese vessel na Jin Ming Number 16 sa baybaying sakop ng Poblacion Dos sa bayan ng Pambujan sa Northern Samar na halos kasabay ng pagkakasabat ng kontrabando sa Sorsogon.
