Pinagalitan ni Davao City Vice Mayor Paolo Duterte ang anak na si Isabelle matapos ang isinagawang photoshoot sa loob mismo ng Malakanyang para sa debut nito.
Tinawag na ‘disgrace’ ni Paolo ang anak na si Isabelle na hinamon pa niyang magpalit ng apelyido dahil sa kawalang respeto nito.
Sinabi ni Paolo na hindi siya mananahimik lamang matapos aniyang ibugaw ng isang tao ang kaniyang anak.
Sinabihan pa ni Paolo ang anak na hindi siya katulad ng ina at stepfather nito.
Hindi naman tinukoy ng presidential son kung sino ang nagbugaw sa kaniyang anak.
Hiniritan pa ng Bise Alkalde ang anak na mag – aral muna para malagyan ng laman ang utak nito at hindi na aniya nakikinig ang anak dahil sikat na ito sa kawalan ng respeto sa kaniyang sariling ama.
Matatandaang idinepensa ni Pangulong Rodrigo Duterte ang photoshoot ng kanyang apo kay Davao City Vice Mayor Paolo Duterte na si Isabelle sa Malakanyang.
Iginiit ni Pangulong Duterte na lahat naman aniya ng mga bumibisita sa Malakanyang ay nagpapakuha ng larawan doon.
Nakatanggap ng iba’t ibang reaksyon ang nag – viral na pre – debut photos ni Isabelle sa loob ng Malakanyang kung saan makikita ang presidential seal at watawat ng Pilipinas.
