Aarangkada na ang ‘Oplan Biyaheng Ayos’ Christmas 2017 ng Philippine Coast Guard o PCG para sa inaasahang pagdagsa ng mga pasahero ngayong holiday season.
Ayon kay Commodore Joel Garcia, Officer in Charge ng PCG, isasailalim sa mas mahigpit na seguridad ang mga beach, coastal at island resorts simula sa December 18, 2017 hanggang January 8, 2018.
Paalala ni Garcia sa mga pasahero, magpapatupad sila ng mahigpit na inspeksyon sa mga bagahe sa pantalan kung kaya dapat dumating ang mga ito ng tatlong oras na mas maaga bago ang kanilang departure time.
Payo pa ni Garcia, iwasan ang pagdadala ng mga ipinagbabawal na bagay tulad ng patalim at mga nagliliyab o sumasabog na kagamitan para hindi na maabala sa kanilang biyahe.
—-
