Nagsumite na ng kanyang kontra – salaysay sa Department of Justice o DOJ ang customs broker na si Mark Taguba kaugnay sa reklamong paglabag sa ilang probisyon ng Customs Modernization and Tariff Act o smuggling na nag – ugat sa importation ng 6.4 bilyong pisong shabu mula China.
Sa labing siyam (19) na pahinang counter – affidavit na pinanumpaan ni Taguba kay Assistant State Prosecutor Charlie Guhit, itinanggi ng broker na siya ang importer ng iligal na droga na nadiskubre sa Valenzuela City noong Mayo.
Wala din aniyang patunay na siya ang nag – proseso ng pagre – release ng naturang kargamento mula sa Bureau of Customs (BOC) at kung mayroong dapat panagutin sa importasyon ng nasabing kargamento ay hindi siya kundi ang consignee ng produkto.
Kinuwestyon pa ni Taguba ang intensyon ng BOC sa kanilang reklamo na smuggling dahil ang pinagbatayan lamang nito ay ang affidavit ni dating Customs Intelligence Director Neil Estrella na nakunan pa ng larawan kasama si Chen Ju Long o Richard Tan na may – ari ng Longfei Logistics, kung saan nadiskubre ang mga kontrabando.
Kalakip ng counter – affidavit ni Taguba ang kopya ng kanyang affidavit sa senado na kumukwestyon sa ilang hindi nagtutugmang report ng Aduana.