Pabalik na sa bansa ngayong araw ang isa sa mga pangunahing suspek sa pagkamatay ng hazing victim na si Horacio ‘Atio’ Castillo III.
Ayon kay Justice Secretary Vitaliano Aguirre, inaasahang lalapag sa Ninoy Aquino International Airport o NAIA ang sinasakyang eroplano ni Ralph Trangia mula sa Taipei, Taiwan bago mag-tanghali ngayong araw.
Kabilang si Trangia sa mga opisyal ng Aegis Juris Fraternity sa mga nanguna sa initiation rites na ikinasawi naman ni Castillo.
Kasabay nito, sinabi ni Aguirre na handa silang bigyan ng seguridad si Trangia kung hihilingin nito.
Matatandaang tumakas palabas tungong Amerika si Trangia kasama ang kanyang ina ilang araw matapos na pumutok ang balita sa pagkamatay ni Castillo.