Ilang minuto bago tuluyang makasakay ng Air Force 1, napag-alamang may inihabol pang mensahe si US President Donald Trump kay Pangulong Rodrigo Duterte.
Ayon kay Presidential Spokesman Harry Roque, ang mensahe ay idinaan kay Executive Secretary Salvador Medialdea na naghatid naman sa US President matapos dumalo sa huling araw ng ASEAN Summit, noong Martes.
Bukod aniya sa inihayag ni Trump na naging masaya siya sa pagtungo sa bansa, nais din niyang ipaabot kay Pangulong Duterte na gustong-gusto niya ito.
Bago tuluyang sumampa sa Air Force 1, muli itong nagpahatid ng pasasalamat matapos ang ilang araw na pananatili sa Pilipinas.
