Hindi hahayaan ng gobyerno na madehado ang Pilipinas sa territorial dispute sa West Philippine Sea kahit pa gumaganda na ang relasyon ng Pilipinas at China.
Inihayag ito ni Presidential Spokesman Ernesto Abella matapos ihain ang note verbale sa China dahil sa pag-aarmas sa ilang isla ng West Philippine Sea.
Ayon kay Abella, mismong ang Department of National Defense ang nagsabing magmimistula silang pabaya at walang ginawa para sa interes ng bansa kung hindi gagawa ng hakbang para iprotesta ito.
Sa ipinadalang note verbale sa China, nais mabatid ng gobyerno ang katotohanan sa presensya ng mga armas sa spratly islands, lalo na sa ilang islang inokupa ng tsina na bahagi pa ng exclusive economic zone.
Matatandaang sinabi ni Chinese Foreign Ministry Spokesman Geng Shuang na normal lamang na maglagay sila ng mga pasilidad at defense equipment sa kanilang teritoryo, at hindi rin anya nila layunin na isailalim sa militarisasyon ang naturang isla.
By: Meann Tanbio / Aileen Taliping / Race Perez