Kinilala ng Armed Forces of the Philippines (AFP) ang papel ng Reserved Officers Training Corps o ROTC sa pangangalaga ng seguridad sa bansa.
Sa ginanap ang National ROTC Summit at Senior Reservist Leaders Forum 2017 sa Camp Aguinaldo, inihalimbawa ni AFP Vice Chief Lieutenant General Salvador Mison ang malaking kontribusyon ng reserved forces noong panahon ng giyera sa Marawi City.
Dumalo din sa nasabing okasyon si Defense Spokesman Arsenio Adolong kung saan binanggit nito ang plano ni Pangulong Rodrigo Duterte na buhayin at paghusayin pa ang ROTC.
Ang nasabing summit ay dinaluhan ng mga estudyante mula sa iba’t ibang kolehiyo at unibersidad sa bansa.
Matatandaang inaprubahan na ni Pangulong Rodrigo Duterte ang pagpapanumbalik sa ROTC sa Grades 11 at 12 sa lahat ng pribado at pampublikong paaralan sa bansa.
Ito ang napagkasunduan matapos imungkahi ni Defense Secretary Delfin Lorenzana na amyendahan ang Republic Act 7077 para maging mandatory ang ROTC.
Iginiit ni Lorenzana na sa pamamagitan ng ROTC, maipamumulat ang pagmamahal sa bansa, paggalang sa human rights, at pagsunod sa konstitusyon.
Sesertipikahang “urgent bill” ng Pangulo ang pagpapanumbalik sa ROTC at agad itong isusumite sa Kamara at Senado.