Tinawag na ‘fake news’ ng Bureau of Corrections (BuCor) ang lumabas na balita kaugnay ng umano’y pagkamatay ng high profile inmate na si Raymond Dominguez.
Ayon kay BuCor Spokesperson Gabriel Chaclag, kanilang ikinalulungkot na lumabas ang nabanggit na balita sa isang malaking pahayagan at naging dahilan sa pagkakaabala sa proseso at operasyon ng ahensiya.
Dagdag ni Chaclag, naghihintay sila ng paliwanag at paghingi ng pasenasiya mula sa nabanggit na pahayagan.
Gayunman, sinabi ni Chaclag na kanila na ring pinabulaanan ang balitang nasawi si Dominguez at iginiit na kasalukuyan lamang itong naka-isolate sa pasilidad ng New Bilibid Prison matapos magpositibo sa coronavirus disease 2019 (COVID-19).
Una rito, lumabas sa isang broadsheet ang balitang nasawi si Dominguez dahil sa COVID-19, batay sa natanggap na impormasyon ni Volunteers Against Crime and Corruption President (VACC) Arsenio Boy Evangelista mula sa hindi pinangalanang dating justice secretary.
Si Dominguez ay nahatulan ng hanggang tatlumpung taong pagkakabilanggo dahil sa kasong carjacking at pagpatay kina Venson Evangelista at Emerson Lozano.