Isang Filipina domestic helper sa Iraq ang nagpasaklolo sa Department of Foreign Affairs makaraang bugbugin at pagbantaan ng kaanak ng kanyang amo na nakunan pa ng cellphone video.
Na-i-broadcast pa ng OFW na si Alice Aguilan ang insidente sa pamamagitan ng Facebook Live habang wala ang kanyang employer.
Sinimulang i-broadcast ni Aguilan ang livestream video matapos siyang saktan ng kaanak ng kanyang amo na nag-ta-trabaho rin bilang houseboy dahil umano sa kabiguan na gawin ang ipinag-uutos sa kanya.
Nagsasagawa ng salat o isang ritual prayer ang lalaking Iraqi nang kunan ng video ng O.F.W. pero agad huminto ang houseboy at nilapitan si Aguilan at pinagsasakal hanggang sa suntukin at hampasin ng tsinelas.
Nagpasaklolo na kay Foreign Affairs Secretary Alan Peter Cayetano si Aguilan lalo’t wala anyang indikasyon na tutulungan siya ng kanyang amo dahil sa kanyang pagiging undocumented at overstaying OFW.
Samantala, nakipag-areglo na lamang si Aguilan sa Iraqi houseboy sa halip na magsampa ng kaso.