Natagpuan ang bangkay ng isang hindi pa kilalang lalaki na nakasilid pa sa sako sa Road 10, Tondo sa lungsod ng Maynila kagabi.
Ayon sa barangay tanod na si Genaro Tabada, may natanggap silang impormasyon mula sa ilang mga kabataan sa lugar hinggil sa nakita nilang labi ng tao.
Nangangalakal lamang umano ang mga naturang kabataan nang makita ang sako dakong alas-11:30 kagabi kung saan, tumambad sa kanila ang braso ng naturang bangkay.
Dahil dito, agad nagtungo sa pulisya ang mga naturang kabataan at nakumpirmang tao nga ang laman niyon matapos ang ginawang pagsisiyasat.
Naka-kulay orange na t-shirt at cargo shorts ang naturang lalaki na tinatayang nasa 40-taong gulang at may saksak sa leeg.
Bagama’t may nakitang ID sa biktima pero inaalam pa kung iyon nga ang tunay na pagkakakilanlan ng biktimang hinihinalang biktima ng salvage o summary execution.
(Ulat ni Gilbert Perdez)