Labing-isang (11) miyembro na ng Islamic State-inspired group ang napapatay ng militar sa bayan ng Carmen, North Cotabato, simula noong Sabado.
Ayon kay Capt. Arvin John Encinas, Spokesman ng 6th Infantry Division, isang CAFGU member na ang nalagas sa kanilang hanay habang apat na sundalo na ang nasugatan sa nagpapatuloy na operasyon.
Isinagawa ang airstrikes sa liblib na bahagi ng Barangay Tonganon kung saan sinasabing nagtatago ang grupo ni Bangsamoro Islamic Freedom Fighters o BIFF Commander Esmael Abdul Malik alyas Abu Toraife.
Mayroon din anyang kaugnayan sa grupong Maute Group, Abu Sayyaf at Ansar Al-Khalifa ang BIFF.
Hindi pa mabatid kung may mga foreign fighter na kabilang sa mga napatay na bandido.
—-
