Aabot sa kabuuang 1,499 na mga pasaway ang kinastigo ng Philippine National Police (PNP) sa unang araw ng pagpapatupad ng uniform curfew hours sa Metro Manila.
Ito’y batay sa datos mula sa Joint Task Force COVID-19 Shield na nagsabing pangkalahatang naging maayos at mapayapa naman ang naging operasyon ng pulisya.
Ayon kay Task Force Commander at PNP Deputy Chief for Operations P/LtG. Cesar Hawthorne Binag, bumandera ang lungsod ng Maynila sa may pinakamaraming naaresto na nasa 1,139.
Batay naman sa ulat ng NCRPO, aabot sa 1,588 quarantine violators ang pinagmulta subalit may pagpipilian naman ang mga ito kung babayaran ang multa o sasailalim sa community service.
Habang nasa 547 naman na mga lumabag o mga hindi kasama sa mga exempted sa curfew subalit nakitang pagala-gala sa labas ng bahay ang pinagsabihan lamang.
Muli namang nanawagan si PNP OIC P/LtG. Guillermo Eleazar sa publiko na huwag nang pasaway at sundin na lamang ang mga batas na kanilang ipinatutupad upang mapigilan na ang walang prenong pagtaas ng kaso ng COVID-19. —ulat mula kay Jaymark Dagala