Nilinaw ng Philippine National Police (PNP) na posisyon at hindi ranggo ang tinutukoy na promosyon para kay National Capital Region Police Office (NCRPO) Director P/Mgen. Debold Sinas.
Ito’y kasunod ng naging pahayag ni Interior and Local Government Sec. Eduardo Año na hindi na maaaring umakyat ng ranggo si Sinas dahil kulang na sa isang taon bago ito magretiro sa serbisyo alinsunod sa patakaran ng National Police Commission (Napolcom).
Ayon kay PNP Chief P/Gen. Camilo Cascolan, iba aniya ang promosyon sa ranggo at ang promosyon sa posisyon na kaniyang tinutukoy para kay Sinas lalo’t maganda naman ang naging performance nito.
Iginiit ni Cascolan na lahat ng pulis kabilang na si Sinas ay kuwalipikado sa promosyon basta’t maganda ang kanilang performance sa trabaho at hindi nasangkot sa iba’t-ibang katiwalian.
Una nang inihayag ng PNP Chief na ikinukonsidera kasi niyang i-akyat sa mas mataas na posisyon si Sinas sa PNP habang si Calabarzon Police Director P/Bgen. Vicente Danao ang nais niyang maging kapalit ni Sinas sa NCRPO.
