Pinag-aaralan na ng mga lokal na opisyal sa Palawan ang muling pagbubukas ng mga tourism activities sa lalawigan sa pamamagitan ng pagsasagawa ng dry run sa El Nido.
Ayon kay Palawan Governor Jose Chaves Alvarez, sa kasulukuyan ay hinihintay na lamang nila ang pahintulot mula sa Department of Tourism para sa kanilang panukala.
Sa ilalim aniya ng dry run, ipagbabawal pa rin ang mga mass gathering at tanging mga lokal na turista lamang ang papayagan makapasok sa el nido matapos maisalang sa COVID-19 test.
Iginiit naman ni Alvarez na kinakailangan na ang unti-unti at maingat na pagbubukas ng turismo sa Palawan dahil marami aniya ang mamamatay sa gutom kung walang trabaho o anumang pangkabuhayan.
Sa kasalukuyan, nananatiling sarado ang turismo sa Palawan bilang pag-iingat sa pagkalat ng COVID-19 sa lalawigan.