Hinamon ng Malakanyang si Senador Antonio Trillanes IV na huwag magtago sa parliamentary immunity bilang isang mambabatas.
Kasunod ito ng panibagong alegasyon ni Trillanes na nagbayad umano si Pangulong Rodrigo Duterte ng sampung milyong piso sa isang Daniel “Snooky” Cruz kapalit ang mga pekeng impormasyon hinggil sa kaniya umanong offshore accounts.
Ayon kay Presidential Chief Legal Counsel Atty. Salvador Panelo, hindi dapat mabahala si Trillanes na dalhin sa labas ng senado ang kaniyang mga paratang kung totoo nga ang kaniyang mga sinasabi.
Kaduda-duda rin ayon kay Panelo ang paratang ng senador dahil imposible aniyang magbayad ang Pangulo lalo’t mayroon itong access sa intell o intelligence community bilang Punong Ehekutibo.
