Inaasahang mababawasan ang mabigat na daloy ng trapiko sa EDSA sa sandaling aprubahan ang operasyon ng South Integrated Bus Terminal o SIBT sa Santa Rosa City, Laguna.
Tinatayang 5000 bus na bumibiyahe sa iba’t ibang lalawigan ang mababawas sa EDSA partikular sa Cubao, Quezon City at Pasay.
Ayon kay Santa Rosa City Mayor Dan Fernandez, alinsunod sa plano, itatayo ang state-of-the art integrated terminal sa 10-ektaryang lupain malapit sa Mamplasan Exit sa South Luzon Expressway.
Nasa 160 bus ang maaaring humimpil sa SIBT at puwede rin sa mga point-to-point, taxi, UV Express at maliliit na van na sasalo sa mga pasahero na papasok at palabas ng Metro Manila.
Magtatayo rin ng PNR Station na 10-minuto ang layo mula sa South Integrated Terminal kaya’t malaking katipiran at ginwaha para sa motorista lalo sa tinatayang 250,000 pasahero mula Southern Provinces.
Bagaman aprubado na ng Department of Transportation o DOTr ang proyekto, inihayag ni Fernandez na dapat munang laparan ang mga kalsada patungo sa mga terminal at magdagdag ng dalawang lane sa SLEX.
By Drew Nacino
SMW: RPE
