Iniutos ng Presidential Electoral Tribunal (PET) na magkomento ang Commission on Elections (COMELEC) at Office of the Solicitor General (OSG) hinggil sa nakabinbing electoral protest ni dating Senador Bongbong Marcos kontra sa nakatunggali nitong si Vice President Leni Robredo.
Ang naturang komento ay ipinasusumite ng dalawang ahensya ng pamahalaan sa loob ng 20 araw.
Habang binigyan naman ng 15 araw ang ibang partido na sagutin ang ibibigay na komento ng COMELEC at OSG.
Bukod pa rito, iniutos din ng PET na i-report ng COMELEC kung may naihaing petisyon hinggil sa failure of elections sa lalawigan ng Lanao Del Sur, Basilan at Maguindanao.
Ang resulta ng naganap na eleksyon kasi sa tatlong lalawigan ay siyang pinawawalang bisa ni Marcos sa PET dahil sa umano’y nagaganap na pre-shading ng balota at insidente ng terorismo.
Ibig sabihin, pinagkokomento ang COMELEC at OSG para bigyang-linaw kung ang PET ba ay pupwedeng magdeklara ng annulment of elections nang hindi nagsasagawa ng special elections.
