Posibleng mahirapan nang ibalik sa kaban ng bayan ang sobrang siningil na buwis ng Bureau of Internal Revenue na nakolekta dahil umano sa pang-aabuso sa paggamit ng Letter of Authority (LOA).
Ayon kay Senate Blue Ribbon Committee Vice Chairman Erwin Tulfo, walang record ang BIR ng sobrang singil na buwis mula sa mga negosyante habang ang ibang nakokolekta ay ibinubulsa ng ilang empleyado ng ahensya.
Bagaman malaking halaga ng buwis ang nalilikom mula sa mga LOA at mission order, 25 percent lamang anya ng tax collection ang ini-rere-mitt ng mga BIR personnel.
Nangangamba naman si Senador Tulfo na sakaling mapatunayang totoo ang mga alegasyon ay magkakaroon ito ng malaking epekto sa business sektor at ekonomiya dahil mawawala ang tiwala at kumpiyansa ng mga foreign investor sa Pilipinas.
Patunay nito ang mga natatanggap na reklamo ng ilang foreign ambassador mula sa kanilang mga kababayang nagne-negosyo sa bansa. —Sa panulat ni Anjo Riñon
