Nasawi ang 24-anyos na law student na si Nath Alcantara matapos umanong mahulog mula sa ikaapat na palapag ng isang condominium building sa Bonifacio Global City (BGC), Taguig City.
Si Alcantara, na nag-aaral sa Ateneo BGC, ay residente umano ng Fort Victoria sa Barangay Fort Bonifacio at anak ni Noli Alcantara, district engineer ng Department Of Public Works And Highways (DPWH) Negros Oriental 2nd District Engineering Office.
Batay sa inisyal na imbestigasyon, bandang 7:30 ng umaga noong Setyembre 18 nang makarinig umano ng malakas na kalabog ang isang security officer. Nang puntahan kasama ang maintenance personnel ang pinagmulan ng ingay, natagpuan ang wala nang buhay na biktima.
Isinailalim sa crime scene processing ng mga imbestigador mula sa Taguig City Police Station at Southern Police District Forensic Unit ang lugar. Patuloy ang imbestigasyon upang matukoy ang buong pangyayari.
