Kinumpirma ng National Bureau of Investigation na hiniling na nila sa International Criminal Police Organization o Interpol na ilagay na sa red notice si dating Ako Bicol Party-list Rep. Zaldy Co.
Gayunman, nilinaw ng NBI na ang kanilang request ay noon pang Nobyembre a-bente-tres inihain o idinaan sa Philippine Center on Transnational Crime.
Ipinaliwanag ni NBI Spokesman Palmer Mallari na kapag inaprubahan ng Interpol ang red notice ay agad na ipapadala ang kopya nito sa lahat ng mga bansang kasapi para ipaalam na may inilabas na warrant of arrest ang hukuman sa Pilipinas para maaresto si Co.
Ang Interpol red notice ay isang global alert system kung saan ia-alerto at ia-alarma ang lahat ng law enforcement groups o units para hanapin o arestuhin ang isang tao kahit nasa ibang bansa.
Magugunitang nagbitiw bilang party-list representative at nangibang-bansa si Co matapos itong masangkot sa bilyon-bilyong pisong kickback umano sa mga flood control projects. —Sa panulat ni Anjo Riñon
