Nilinaw ni Labor Secretary Silvestre Bello III na walang kautusan para sa work stoppage o pagpapatigil sa ginagawang Skyway Extension Project makaraang maganap ang isang aksidente na kinasawi ng isa at kinasugat ng apat na katao.
Ito ang paglilinaw ni Bello makaraang makatanggap ito ng ilang ulat na umano’y nagpalabas ng stoppage order ang Department of Labor and Employment (DOLE) habang nagpapatuloy ang imbestigasyon.
Paliwanag ni Bello, sa ngayon ay hinihintay pa nito ang resulta ng ginagawang imbestigasyon sa insidente.
Oras namang ilabas ang resulta ng report, at tsaka pa lang magdedesisyon ang ahensya.
Mababatid na kaninang umaga pa lang nakarating sa tanggapan ni Bello ang report mula sa regional director at executive director ng occupational safety and health center ng DOLE.
Sa ngayon, patuloy na nirereview ni Bello ang rekomendasyon ng naturang report.