Dapat nang itigil ang sisihan!
Ito ang panawagan ni Isabela Governor Rodito Albano III kaugnay sa sinasabing anomalya sa flood control projects ng gobyerno.
Aminado si Governor Albano na halos lahat naman ng opisyal ng pamahalaan ay may pagkukulang pagdating sa implementasyon ng mga proyekto—bagay na dapat tanggapin at solusyonan sa halip na manisi.
Binigyang-diin ng gobernador na wala namang patutunguhan kung palaging magtuturuan at sinisira lamang nito ang kumpiyansa ng taumbayan sa mga inihalal na opisyal.
Samantala, tiniyak naman ni Albano na handa siyang humarap sa imbestigasyon kung ipapatawag siya ng Senado o Kamara makaraang pumangatlo ang Isabela sa mga lalawigang may pinakamaraming flood control projects.
