Pinatatanggal ng isang consumer group ang sinisingil na service fee ng National Food Authority o NFA sa mga inaangkat na bigas na ibinigay sa mga malalaking traders at mga kooperatiba ng mga magsasaka.
Sa panayam ng DWIZ, isiniwalat ni United Filipino Consumers and Commuters President RJ Javellana na piso at singkwenta sentimos (P1.50) kada kilo o katumbas ng pitumpu’t limang piso (P75) ang ipinapataw na service fee ng NFA sa bawat sako ng inaangkat nitong bigas.
Dahil dito, hindi aniya malayong ipasa sa mga konsyumer ang naturang bagong singilin ng NFA na taliwas aniya sa mandato ng ahensya na bigyan ng murang bigas ang mga mamimiling Pilipino.
“Meron na ngang passes and duties sa Bureau of Customs, meron na ngang nakapatong diyan and then ngayon sasabihin natin eh meron na namang service fee na ibinalik ang National Food Authority, eh kung talagang ang NFA ay maka-masa at nais niya ng mababang presyo ng bigas sa merkado ay dapat tanggalin niya ‘yan, para naman hindi ipasa ng mga kooperatibang maliliit, ng mga magsasaka, at ipasa ng mga tinatawag nating traders at importers nang super laki.” Pahayag ni Javellana
(Balitang Todong Lakas Interview)
