Iimbestigahan ng Senado ang mga umano’y pag-abuso sa pagtaas ng presyo ng mga pangunahing bilhin dulot ng pagpapatupad ng Tax Reform for Acceleration and Inclusion (TRAIN) Law.
Ayon kay Senador Sherwin Gatchalian, chairman ng Senate Committee on Energy, tututukan nila ang mga ulat na natanggap kaugnay sa ilang mga grocery at gasolinahan ang nagtaas na ng presyo noon pang Disyembre ng nakaraang taon gayung wala pang naipapatupad na reporma sa buwis.
Dagdag pa ni Gatchalian, bukod dito, bubusisiin din nila ang halagang dinadagdag sa presyo ng mga produktong petrolyo kung ito ba ay akma sa ipinataw na excise tax.
Giit ng senador, magkaroon man ng pagtaaas ng presyo sa mga pangunahing bilihin at gasolina hindi ito dapat maging ganung kabigat para sa mga konsyumer.
DOE magsasagawa ng inspeksyon sa mga oil depot
Magsasagawa ng inspeksyon ang Department of Energy (DOE) sa inventory ng mga oil depot.
Ayon sa DOE, kaugnay ito sa tamang pagpapatupad ng oil excise tax bunsod ng reporma sa buwis.
Layon umano ng hakbang na ito na matiyak na ipapataw lamang ang excise tax sa mga bagong stock.
Kasabay nito, nagbabala si Energy Secretary Alfonsi Cusi na kung sinuman ang lalabag sa Tax Reform for Acceleration and Inclusion (TRAIN) Law ay maaaring mauwi sa kanselasyon ng kanilang certificate of compliance.