Kabilang ang Kapamilya star at pop singer na si Sarah Geronimo sa isa sa mga nominado sa 2016 MTV Europe Music Awards.
Ang dating ‘The Voice Kids’ coach ay nominated sa Best Southeast Asia Act category kasama sina Dong Nhi ng Vietnam, Singapore’s Gentle Bones, Raisa Andriana ng Indonesia, Thailand’s Thaitanium, at Yuna ng Malaysia.
Isa rin ang Pinay YouTube star na si Donnalyn Bartolome sa posibleng mapabilang sa mga nominado, dahil ang ikapitong spot ay dedesisyunan sa pamamagitan ng isang Twitter poll.
Ibabase sa online votes ang itatanghal na winner at tutungo sa Worldwide Act: Asia Category na makakalaban ang mga winners mula Japan, Taiwan, China at Hong Kong.
Matatandaang noong 2014 ay naipanalo ni Geronimo ang nasabing kategorya ngunit nabigong manalo para sa Worldwide Act Asia award.
Bukod pa dito, inaasahang susungkit din ng mga pagkilala si Geronimo sa 2016 Philippine Movie Press Club Star Awards.
