Hindi kukulangin ang suplay ng kuryente sa 2016 lalo na sa panahon ng eleksyon.
Ayon kay House Committee on Energy Chairman Reynaldo Umali, ito ay base sa pagtitiyak ng Department of Energy sa harap na rin ng problema sa power supply sa Luzon, Visayas at Mindanao.
Sinabi ni Umali na may mga power plant na inaasahang papasok sa power grid sa darating na Nobyembre hanggang sa unang quarter ng 2016.
Magagamit din aniya ang Interruptible Load Program o ILP sakaling magkulang ang suplay ng kuryente sa mismong araw ng botohan.
Kasabay nito, nanawagan si Umali sa pamahalaan na maghanda pa rin lalo’t nagbabanta ang epekto ng El Niño sa power supply at may posibilidad na hindi gumana ang hyrdo-electric power plants dahil dito.
By Meann Tanbio
