Inaresto ng pulisya ang international RNB singer na si Chris Brown matapos ng kanyang konsyerto sa Coral Sky Ampitheater sa South Florida.
Ayon sa Tampa Florida Police, ang pagdakip kay Brown ay dahil sa standing warrant of arrest nito na sinasabing may kaugnayan sa pananapak nito sa isang photographer, dalawang taon na ang nakakaraan.
Sinabi naman ng pulisya na nakalaya rin si Brown matapos ang isang oras nang makapaglagak ito ng dalawang libong dolyar na piyansa.
Magugunitang ilang beses na rin naharap sa kaso si Brown kabilang na ang pananakit sa dati nitong girlfriend at international singer na si Rihanna noong 2009, pagkakasangkot sa gulo sa labas ng isang hotel sa Washington noong 2013 at pagkaka-kick out sa isang rehab facility matapos naman nitong basagin ang bintana ng kotse ng kanyang ina.
