Kasalukuyan nang tinutugis ng pambansang pulisya ang grupong nasa likod ng pagpapasabog sa dalawang tore ng NGCP sa Carmen, North Cotabato.
Batay sa paunang imbestigasyon ng carmen pnp, gumamit umano ng improvised explosive device mula sa 60 milimeter mortar base na rin sa narekober na debris sa pinangyarihan ng pagsabog.
Bagama’t pinasabugan, sinabi ni C/Insp. Julius Malcontento, Hepe ng Carmen PNP na nagawan pa rin ng paraan at nagagamit pa rin ang dalawang tore dahil bigo ang mga suspek na mapatumba ito.
Kasalukuyan nang kinukumpuni ang dalawang pinasabugang tore habang ipinagpapatuloy naman ng pulisya ang imbestigasyon sa insidente.
Rotational brownout
Madaragdagan pa ng halos 5 oras ang ipinatutupad na rotational brownout sa lalawigan ng North Cotabato.
Ito’y ayon sa National Grid Corporation of the Philippines o NGCP matapos pasabugan ang dalawa sa mga tore nito.
Lubhang napinsala ng pagsabog ang tower 95 at 95 na matatagpuan sa Barangay Kitulaan sa bayan ng Carmen sa nasabing lalawigan.
Dahil dito, apektado ng pagpapasabog ang buong linya na sinusuplayan ng Kibawe-Kabacan transmission line.
Sa kabuuan, may 5 transmission tower na ang NGCP sa bayan ng Carmen ang pinasabog ng mga hindi pa rin natutukoy na grupo.
By Jaymark Dagala