Hinikayat ni Magdalo Partylist Rep. Gary Alejano ang pamahalaan na agad nang simulan ang rehabilitasyon ng Marawi City.
Ito’y ayon kay Alejano makaraang kumpirmahin ng AFP o Armed Forces of the Philippines at ng Department of National Defense ang pagkakapatay sa dalawang lider terorista na sina ISIS Emir Isnilon Hapilon at Maute terror group leader Omar Maute.
Ayon kay Alejano, dapat nang maibalik sa normal ang pamumuhay ng mga residenteng nawalan ng tahanan at nagtiis ng halos limang buwan sa mga evacuation centers.
Dapat aniyang isa-alang-alang ng pamahalaan na ang kahirapan ang siyang ugat ng terorismo at gulo sa Mindanao kaya’t dapat na itong matugunan sa lalong madaling panahon.
Kasunod nito, pinapurihan din ni Alejano ang mga sundalo at pulis na nagbuwis ng buhay para sa pakikipaglaban sa mga terorista na walang ginawa kundi maghasik ng karahasan sa mga inosente.