Inihayag ng pamunuan ng Philippine Statistics Authority (PSA) na kanilang bubuksan ang registration process para sa Philippine Identification System (PhilSys) nito.
Ayon kay deputy national statistician at PSA Assistant Secretary Rosalinda Bautista, sisimulan na ito sa mga probinsya sa darating na Lunes, ika-18 ng Enero.
Dagdag ng PSA, target nitong marehistro ang nasa 50-milyon hanggang 70-milyong Pilipino bago magtapos ang 2021.
Mababatid na sa ngayon ay nagsasagawa ang PSA ng small-scale at gradual roll-out ng step 2 PhilSys registration para sa mga indibidwal na nakapagtapos na sa unang step ng registration.
Paliwanag ni Bautista, sa step 2 registration, kinakailangan ang validation ng iba’t-ibang dokumento, maging ang pagkuha ng biometric information gaya ng fingerprint, iris scans, at pagkuha ng litrato.
Kasunod nito, ani Bautista, posibleng sa susunod na buwan ay isagawa ng ang mass rollout ng step 2 process.
