‘Premature’ o masyado pang maaga para magsulong ng panibagong batas na katulad ng Bayanihan 1 at 2 para matugunan ang epekto ng coronavirus disease 2019 (COVID-19) pandemic at mga kalamidad.
Ito ang inihayag ni Presidential Spokesperson Harry Roque, kasunod na rin ng panghihikayat ng ilang mambabatas na muling magpasa ng isa pang Bayanihan Law.
Ayon kay Roque, hindi pa kailangang magpanukala ng Bayanihan 3 hangga’t wala pa ang pinal na bersyon o naipapasa ng proposed 2021 national budget.
Ani Roque, posibleng nakapaloob na sa 2021 national budget ang mga karagdagang pondo para sa mga programa o proyekto na tutugon sa pandemiya at nakalipas na kalamidad.
Binigyang diin ni Roque, madali lamang aniyang ihain at maipasa muli ang Bayanihan 3 kung makikitang may kakulangan sa nilalaman o anyo ng national budget para sa 2021.