Magsasagawa ng random inspection ang Land Transportation Franchising and Regulatory Board (LTFRB) sa mga taxi terminal sa Ninoy Aquino International Airport (NAIA), ngayong araw.
Ito’y bunsod ng reklamo na sobra ang sinisingil ng mga taxi driver sa mga pasahero lalo sa mga balikbayan at dayuhan.
Ayon sa LTFRB, nais nilang matiyak na ang mga iligal na aktibidad hinggil sa transportasyon ay mabawasan o tuluyang mapuksa.
Kabilang ang naturang issue sa tinalakay ng LTFRB sa kanilang pakikipag-pulong sa Manila International Airport Authority (MIAA) kahapon.
Karaniwang inirereklamo ng mga pasahero ang dollar rate card ng mga taxi o naniningil ng dolyar sa halip na piso ang ipambayad at ang mas malaking singil sa mga dayuhan.
Viral taxi driver
Nakatakda namang maglabas ng desisyon sa lalong madaling panahon ang Land Transportation Office (LTO) kung kakanselahin o hindi ang lisensya ng taxi driver na una ng inireklamo dahil sa pagmumura at sobrang paniningil sa kanyang pasahero.
Ayon kay Atty. Ariel Inton, Board Member ng Land Transportation Franchising and Regulatory Board (LTFRB), hinihintay na lamang nila ang pinal na pasya ng LTO bago patawan ng parusa ang tsuper na si Roger Catipay.
Si Catipay ang nakunan sa viral video na naniningil ng P250 pesos na pasahe sa dalawang babae na kanyang pasahero gayong P140 pesos lamang ang metro.
Naganap ang insidente sa POEA sa kanto ng Edsa at Ortigas Avenue, Mandaluyong City habang minamaneho ng barumbadong tsuper ang AFG taxi na may plakang UWB-666.
Samantala, posible namang pagmultahin ng P5,000 pesos ang operator ng AFG na si Ariel Gamboa.
By Drew Nacino
