Pormal nang magsisimula bukas, Mayo 17 ang banal na buwan ng Ramadan ng Islam.
Ayon kay National Commission on Muslim Filipino Bureau of Pilgrimage and Endowment Chief Mito-on Ibra, kanilang isinagawa ang moon sighting kagabi na ginagamit na hudyat sa pagsisimula ng banal na buwan ng mananampalatayang Islam.
Gayunman hindi anila nakita ang buwan kaya nangangahulugan itong sa susunod na araw pa magsisimula ang Ramadan.
Ang Ramadan ay ika-siyam na buwan sa kalendaryong Islam at isa sa pinakamahalagang buwan dahil sa paniniwalang dito inihayag ni Allah ang banal na aklat na Qur’an sa propetang si Muhammad.
Ito ang buwan ng pagsasakripisyo, kung saan hindi maaaring kumain o uminom ng tubig at magtalik ang mag-asawa mula sa pagsikat hanggang paglubog ng araw habang kinakailangan naman ang mataimtim na pagdarasal, limang beses sa isang araw.
—-
