Maaari umanong luwagan ang quarantine protocols sa NCR Plus Bubble kung bababa sa 2,000 ang maitatalang kaso ng coronavirus disease 2019 (COVID-19) sa bansa kada araw.
Ito’y ayon sa OCTA Research group sa gitna ng diskusyon at rekomendasyon kaugnay sa susunod na magiging quarantine status sa NCR Plus Bubble matapos ang pag-iral ng dalawang linggong modified enhanced community quarantine (MECQ).
Ayon kay Dr. Guido David ng OCTA Research group, kung mananatiling mataas sa 2,000 ang maitatalang COVID-19 case kada araw, mapupuno pa rin ang mga ospital sa rehiyon.
Ani David, hindi pa pwedeng magpatupad ng mas maluwag na quarantine restrictions dahil malaki pa ang tyansa na mabaliktad ang epekto nito sa halip na bumaba ang kaso ng COVID-19 sa bansa.
